کوچه
سنسیز آیلی گئجه ده من، یئنه اول کوچه دن اؤتدوم
وار وجودوم لا گؤز اولدوم، حئیران آردینجا گزیشدیم
سنی گؤرمک ماراغی چاغلادی جانیم چاناغیندا
یئنه اولدوم سنه وورغون ، سنه شئیدا
جانیمین ان قارا ظولمت بوجاغیندا
خاطیرهن نورونو ساچدی
یادی نین گولشهنی آچدی
گول یادین عطرینی ساجدی
یادیما دوشدو قوشا بیر گئجه
اول کوچه دن اؤتدوک
قاناد آچدیقدا او، آرام گئجه
بیرلیکده دولاندیق
نئچه آنلیق بولاغین سئیرینه دالدیق
سن تؤکولموش بوتون اسرار جهان قاره گؤزونده
من ده ، دالمیش باخیشیندا او، اوزونده
گؤیده اولدوز گئجه آرام
باخت یار اولدو ، زامان رام
آی ، اوزون نازلی بولاغدا سویا سالمیش
اللری گؤیده بولاغلار سانکی آیی اله آلمیش
گئجه و چول و چامورلوق ، همی داشلیق
هامیسی بایقوشون آوازینادالمیش
یادیما دوشدو ، دئدین : گل ، چکین آرتیق بوراخ عشقی
نئچه آنلیق سویا بیر باخ !
سو دئییدیرلمی موقت هوه سین گوزگوسو آرتیق ؟
سن بوگون بیر باخیش ایله نیگران اولسان عزیزیم
صاباحی گؤزله کی ، کؤنلون یاد الینده اولاجاغدیر
اوره یین عشقی اونوتسون دئیه بو شهری بوراخ گئت
دئدیم : عشقی انودوم مو؟
سنی ، بیر آن ، من آتیممی ؟
ایلک گوندن کی بو کؤنلوم قاناد آچدی سنه ساری
قوناراق دام باشینا من سنه باخدیم
سن داش آتدین ، منی قاودین
من نه قاچدیم ، نه ال اوزدوم
اووچواولسان دئدیم اول ، من ده اووام بو قارا چؤل ده
من بو عشقی اونودوم می ؟
سنی بیر آن من آتیم می ؟
گوزیاشی آخدی بوداقدان
اینله ییب بایقوش اوچوب ، کؤچدو بوداقدان
گؤزیاشین تیتره ییب، آخدی
آی دا بو عشقینه گولدو
یادیما دوشدو کی ، دینمز ، سؤله مز قالدین او حالدا
منده آرتیق غمه دالدیم
نه ال اوزدوم نه ده قاچدیم
باتدی غم ظولمتینه
اول گئجه ، هم ده قارا گونلر
نه کئچیرسن داها اول کوچه دن آرتیق اؤتوشورسن
نه ده دردیندن اؤلن عاشیقینی باشه دوشورسن
سنسیز ایندی نئجه اول کوچه یه آددیم باسارام من؟؟؟
۷۸/۷/۲۵
یوسف حسنی اعظمی
